Sérhæfðir tímaþjónar eru netbúnaður sem sérstaklega þjónar því hlutverki að miðla réttum tíma til annarra tölva. Til að tryggja afköst og nákvæmni, gera þessir þjónar nánast ekkert annað. Til að geta miðlað sem réttustum tíma, nota slíkir tímaþjónar yfirleitt Stratum-0 tímaþjóna til fínstillingar, t.d. atóm-klukkur gegnum langbylgjusendingar eða tímamerki frá GPS-gervihnöttum. Nákvæmnin getur verið frá nokkrum millisekúndum upp í +/- 100 nanósekúndur (einn tíu-milljónasti úr sekúndu) miðað við UTC. Tímaþjónar sem tengjast beint við áreiðanleg viðmið, eru jafnan flokkaðir sem Stratum-1. Einnig eru til sérhæfðir tímaþjónar sem nota aðra Stratum-1 tímaþjóna til fínstillingar gegnum NTP samskiptamátann. Þeir eru ódýrari og um leið ónákvæmari en Stratum-1 tímaþjónar, en sjá oft um að afgreiða kúfinn af tímabeiðnum frá SNTP og NTP biðlurum. Nákvæmni þeirra er um +/- 5 ms og flokkast gjarnan sem Stratum-2 tímaþjónar. Helstu kostir Helsti kostur sérhæfðra tímaþjóna, er að það fer lítið fyrir þeim og þeir þurfa lítið viðhald. Eftir að þeir hafa einu sinni verið settir upp, þarf varla að líta á þá svo mánuðum eða árum skiptir. Þeir einfaldlega samstilla sig reglulega við sitt viðmið og sjá síðan um að miðla réttum tíma til sinna "viðskiptavina". Annar kostur slíkra tímaþjóna, er að þeir ráða við mikið álag, allt frá 200 upp í 7.000 beiðnir/sek. Auk þess eru þeir yfirleitt útbúnir með mjög áreiðanlegum innri klukkum og geta því miðlað "réttum" tíma jafnvel þótt þeir missi samband tímabundið við viðmið sitt. Stöðugleikinn kemur þó í nokkrum gæðaþrepum og fer verðið eftir því: TCXO = Temperature-Compensated Crystal Oscillator (frávik ca. 10 ms/dag) OCXO = Oven Compensated Crystal Oscillator (frávik ca. 1 ms/dag) Rubídíum klukka (frávik ca. 1 míkrósekúnda á dag) Cesíum klukka (frávik minna en 1 nanósekúnda á dag)   Stratum-2 tímaþjónar Eins og áður var nefnt, henta Stratum-2 tímaþjónar sem master-tímaþjónar á staðarnetum fyrirtækja, sem gera hóflegar kröfur um nákvæman tíma. Hér eru nokkur dæmi: Little Time Server frá Moabtime kostar um 10.000 kr. og hentar fyrir lítil og meðalstór staðarnet. Hann höndlar um 50 beiðnir/sek. Nákvæmnin er hins vegar ekki til að hrópa húrra yfir, ca. +/- 5-15 ms og frávik á dag um 100 ms ef samband næst ekki við viðmiðunar-tímaþjóna. Net Master Clock frá Moabtime kostar um 100.000 kr. og hentar fyrir meðalstór staðarnet. Hann höndlar um 200 beiðnir/sek. Þessi búnaður getur samstillt sig við aðra NTP-tímaþjóna, GPS eða DSF útvarpssendinguna. Nákvæmnin er ca. +/- 3 ms og frávik á dag um 100 ms ef samband næst ekki við viðmiðunar-tímaþjóna. Stratum-1 tímaþjónar Stratum-1 tímaþjónar eru tengdir við atóm-klukkur eða GPS, og því æði nákvæmir. Verðið liggur á bilinu 150.000 kr. upp í ca. 500.000 kr. án VSK. Það ræðst einkum af afkastagetunni og/eða nákvæmni innbyggðu klukkunnar. Hér eru nokkur dæmi: TimeTools GPS NTP Server s5100 kostar um 150.000 kr. og er með innbyggðum GPS-móttakara. Nákvæmni um 50 míkrósekúndur og afkastageta um 2.000 beiðnir/sekúndu. Frávik á dag ef samband næst ekki við viðmið er ekki gefið upp. Hentar vel fyrir kröfuharða notendur, sem vilja samt halda kostnaði í hófi. Unison GPS Network Time Server frá Endrun Technologies kostar um 200.000 kr. og er með innbyggðum GPS-móttakara. Nákvæmni 10 míkrósekúndur og afkastageta a.m.k. 500 beiðnir/sekúndu (ekki gefið upp nákvæmlega). Ef samband næst ekki við viðmið, er frávik um 10 ms á dag. Hentar vel fyrir kröfuharða notendur, sem eru tilbúnir að borga fyrir gæði. Endrun Technologies býður upp á öflugri tímaþjóna fyrir þá sem gera enn meiri kröfur. SyncServer S200 frá Symmetricom kostar frá rúmum 300.000 kr. og er með innbyggðum GPS-móttakara. Nákvæmni um 50 nanósekúndur og afkastageta um 3.200 beiðnir/sekúndu, gegnum þrjár sjálfstæðar nettengingar. Ef samband næst ekki við viðmið, er frávik um 21 ms á dag. Með OXCO sem kostar um 60.000 kr. aukalega, fæst 1 ms stöðugleiki/dag. Rúbídíum atóm-klukka fáanleg. Innbyggt takkaborð og skjár fyrir umsýslu. Þessi er fyrir mjög kröfuharða notendur, sem eru tilbúnir að borga fyrir gæði. Symmetricom býður upp á enn öflugri tímaþjóna, og fer verðið eftir því.   Þú getur fundið enn fleiri slíkar lausnir, með því að leita í Google að "Network Time Servers". Til baka á yfirlit   © 2007 - Hugmót ehf - Allur réttur áskilinn