GPS kerfið samanstendur af fjölda gervihnatta (nú 31), sem svífa á braut um jörðu í ca. 22.200 km hæð. Gervihnettirnir senda reglulega frá sér upplýsingar um nákvæma staðsetningu og tíma. GPS móttakarar reikna síðan út staðsetningu eigandans með samanburði útsendinga frá 3 gervihnöttum í það minnsta. Því fleiri gervihnettir í sjónlínu, því meiri verður nákvæmnin. Kostir GPS-lausna Með því að tengja GPS við tölvu eða sérhæfðan tímaþjón, má ná allt að 0,1 míkrósekúndu nákvæmni (100 nanósekúndur) miðað við UTC. Algeng nákvæmni í raun er þó um 0,5-1 millisekúnda, vegna þess hve ómerkilegar klukkurnar í tölvunum eru. Gallar GPS-lausna Helsti ókostur GPS lausna, er krafan um aðgang að "himninum", þ.e. koma þarf loftneti fyrir í glugga með góðu útsýni eða uppi á þaki. Stundum þarf að setja upp festingar og leggja dýrar lagnir til að þetta gangi upp. Annar ókostur er að Bandaríkjastjórn hefur full yfirráð yfir GPS-kerfinu, og getur lokað fyrir aðgang almennings með stuttum fyrirvara. Þetta er helsta ástæða þess að Evrópuþjóðir hyggjast koma sér upp sambærilegu kerfi, Galileo, innan nokkurra ára. Nokkrar lausnir Flestir framleiðendur GPS-tímastilla, bjóða upp á rekla fyrir Windows. Vissara er þó að kanna það áður en kaup eru ákveðin, sérstaklega ef þú notar nýjustu útgáfur, t.d. Windows Vista. Hér finnur þú lista yfir nokkrar slíkar lausnir, þar sem GPS-móttakari er tengdur við tölvuna gegnum raðtengi (serial port) eða USB-port. Þessar lausnir kosta frá 8.000 kr og upp í ca. 100.000 kr. (án VSK) og sumar krefjast auk þess hugbúnaðar sérstaklega. GPS BU-323 frá USGlobalSat kostar um 6.000 kr. og tengist við USB-port tölvunnar. Hugbúnaður fyrir samstillingu fylgir ekki og þarf að kaupa sérstaklega (ca. 5-10.000 kr.). Þetta er því ódýr lausn og hentar vel þeim sem vilja fínstilla tíma í tölvukerfum sínum, án þess að kosta miklu til. TimeTools GPS Time - T1000 er áreiðanleg lausn, með GPS-móttakara sem tengist í raðtengi á tölvunni. Nákvæmni um 100 nanósekúndur. Kostnaður um 50.000 kr. GPS170PCI frá Meinberg er PCI-spjald sem sett er inn í tölvuna. Kostnaður um 95.000 kr. Góð lausn fyrir þá sem vilja hafa þessa virkni innbyggða í tölvunni og fækka leiðslum.   Lausnir fyrir Linux, Mac og iSeries Linux-tölvur geta nýtt sér GPS-tímastilla, ef viðeigandi reklar eru fáanlegir. Mac-tölvur með nýjasta stýrikerfinu, ættu að geta notað sömu rekla og Linux, þar sem Mac OSX er byggt á Unix. IBM iSeries er best að nota óbeint, þ.e. láta hana samstilla sig við PC-tölvu eða sérhæfðan tímaþjón, sem stillt eru með GPS-tengingu. Til baka á yfirlit   © 2007 - Hugmót ehf - Allur réttur áskilinn