SNTP stendur fyrir Simple Network Time Protocol (RFC 2030) og er í raun einföld útgáfa af Network Time Protocol (NTP). Þessi staðall er mjög útbreiddur og gerir tölvum og öðrum búnaði kleift að fá réttan tíma, ýmist til að birta beint eða til að fínstilla innbyggðu klukkuna. SNTP biðlarar (clients) senda fyrirspurn til NTP-tímaþjóna og fá til baka nákvæman tíma. Að vísu þarf að taka tillit til seinkunar í samskiptum yfir netið, sem getur skipt nokkrum hundraðshlutum úr sekúndu. Nákvæmnin sem þessi forrit ná yfir Internetið, er því oft um 10-50 ms. frá réttum tíma. Sé notast við áreiðanlegan tímaþjón á staðarneti, getur nákvæmnin orðið 1-5 ms. frá kórréttum tíma. Leiðréttingin er yfirleitt framkvæmd í einu stökki, en ekki með því að flýta/seinka klukkunni í nokkurn tíma. Eldveggir Ef tölvan þín notar eldvegg eða er á bak við einn slíkan (gildir um flestar ADSL-tengingar og netkerfi í fyrirtækjum), gæti þurft að leyfa UDP samskipti á porti 123 til að SNTP og NTP virki. Lausnir fyrir Windows Nýjustu útgáfur Windows stýrikerfisins bjóða upp á samstillingu við SNTP-þjóna. Að vísu er það ósköp einföld aðferð sem gefur litlar upplýsingar um frávik og leiðréttingar. Þar af leiðandi býður fjöldi hugbúnaðarframleiðenda upp á lausnir fyrir Windows, sem virka einnig á eldri útgáfum af stýrikerfinu. Hér er listi yfir nokkur slík forrit sem við höfum prófað og getum mælt með: Samtíma er einfalt og ókeypis forrit frá okkur sem notar NTP-tímaþjón til að fínstilla klukkuna í tölvunni. Það vinnur að jafnaði í forgrunni og birtir þá tímann og mismun miðað við tímaþjóninn. Notendaviðmótið er á íslensku og hjálpartextinn líka. Absolute Time Corrector er nett forrit sem kostar um 20 USD. Forritið leyfir þér að kanna eða samræma tímann hvenær sem er og birtir mismun milli klukku tölvunnar og tímaþjónsins. Það býður upp á fjölda stillinga og er með lipurt viðmót. Chronograph er flott forrit sem kostar um 19 USD. Það býður upp á nokkrar stillingar og er með þægilegt notendaviðmót. Helsti galli þess er að ekki er hægt að tilgreina tímaþjóna eftir smekk, heldur aðeins velja úr 10 algengum tímaþjónum. Domain Time II Client er mjög gott forrit sem kostar tæpa 20 USD. Það býður líka upp á samstillingu skv. öðrum tímastillingarstöðlum. Samstilling er framkvæmd með því að flýta/eða seinka klukkunni um nokkurn tíma, sem er betra en að gera það í einu stökki, sérstaklega fyrir netþjóna eða vinnustöðvar sem vinna mjög tímaháð verkefni. Þetta forrit ásamt Domain Time II Server er eitt það allra besta í þessum flokki. Notendaviðmótið er nokkuð flókið fyrir byrjendur, en kostir forritsins vega upp slíka galla. YATS-32 er gott forrit sem kostar tæpa 20 USD. Fjöldi stillingamöguleika og innbyggður tímaþjónn. Heldur utan um hve mikið klukka tölvunnar víkur frá réttum tíma á sólarhring. Enn fleiri forrit í svipuðum dúr má finna víða í forritabönkum. Nú er bara að prófa ...   Lausnir fyrir Linux, Mac og iSeries Linux-tölvur má samstilla með skipuninni ntpd sem jafnar tímamun í örsmáum áföngum, svo það trufli ekki vinnslu tímaháðra forrita. Það getur notað bæði SNTP og NTP tímaþjóna. Sjá nánari lýsingu á þessari vefsíðu. Mac-tölvur bjóða stillingar í stýrikerfinu, er hægt að tilgreina tímaþjóna í valmyndinni "Set date & time automatically" í "Date & Time preference pane" og er klukkan fínstillt eftir þeim. IBM iSeries (einnig kölluð AS/400) getur samræmt sína klukku við SNTP-þjóna, með því að tilgreina forsendur með skipuninni CHGNTPA eða gegnum iSeries Navigator. Sjá nánari leiðbeiningar á vef IBM. Klukkan í iSeries tölvu er mun stöðugri en í PC-tölvu og hentar hún því sem "master" innan netkerfis. Hún notar þá SNTP biðlara til að leiðrétta eigin klukku, og miðlar réttum tíma til annarra tölva á netkerfinu með SNTP þjónustu. Til baka á yfirlit   © 2007 - Hugmót ehf - Allur réttur áskilinn