NTP stendur fyrir Network Time Protocol (RFC 5905) og er mjög góður staðall til að samræma tíma í tölvukerfum. Hann er flóknari í útfærslu en SNTP en gefur umtalsvert betri árangur. NTP biðlarar (clients) senda fyrirspurn til NTP-tímaþjóna og fá til baka nákvæman tíma. Að vísu þarf að taka tillit til seinkunar í samskiptum yfir netið, sem stundum getur skipt nokkrum hundraðshlutum úr sekúndu. Nákvæmnin sem þessi forrit ná yfir Internetið, er því oft um 5-10 ms. frá réttum tíma. Sé notast við áreiðanlegan tímaþjón á staðarneti, getur nákvæmnin hæglega orðið 0,2-0,5 ms frá kórréttum tíma. Leiðréttingin er yfirleitt framkvæmd með því að flýta/seinka klukkunni yfir hóflegt tímabil og til frambúðar, svo klukkan nái smátt og smátt að fylgja viðmiðunar-klukkunni án þess að gera þurfi róttækar leiðréttingar. Algengt er að nota þrjá eða fleiri tímaþjóna til að miða við, sem gefur meiri nákvæmni og aukið rekstraröryggi. Eldveggir Ef tölvan þín notar eldvegg eða er á bak við einn slíkan (gildir um flestar ADSL-tengingar og netkerfi í fyrirtækjum), gæti þurft að leyfa UDP samskipti á porti 123 til að SNTP og NTP virki. Lausnir fyrir Windows Ýmsir hugbúnaðarframleiðendur bjóða NTP-lausnir fyrir Windows. Hér er listi yfir nokkur slík forrit sem við höfum prófað og getum mælt með: Domain Time II Client er mjög gott forrit sem kostar tæpa 40 USD. Það býður líka upp á samstillingu við tímaþjóna sem nota aðra samstillingarstaðla. Samstilling er framkvæmd með því að flýta/eða seinka klukkunni um nokkurn tíma, sem er betra en að gera það í einu stökki, sérstaklega fyrir netþjóna eða vinnustöðvar sem vinna mjög tímaháð verkefni. Domain Time II er tvímælalaust besta forritið í þessum flokki. Notendaviðmótið er nokkuð flókið fyrir byrjendur, en kostir forritsins vega upp slíka galla. NTP fyrir Windows frá Meinberg er alvöru útfærsla á NTP-staðlinum og getur virkað bæði sem biðlari og miðlari. Forritið er ókeypis og hægt er að sækja líka forritið NTP Time Server Monitor fyrir grafískt viðmót. Annars krefst kerfið hálfpartinn Linux-kunnáttu til að eiga við það. Innifelur hjálpartól eins og ntpq.exe til að fylgjast með árangrinum. Mjög hentugt fyrir kerfisstjóra og áhugamenn um tölvur. PresenTense Time Client frá ByteFusion er býsna gott forrit sem kostar tæpa 40 USD. Það býður upp á tengingu við NTP4-tímaþjóna og GPS-móttakara, en þá getur það náð nákvæmni upp á innan við 1 millisekúndu. Það býður upp á fjölda stillinga og er með lipurt viðmót. Fyrirtækið býður einnig PresenTense Auditor til að fylgjast með tímafrávikum og sanna fyrir dómstólum að klukka tölvukerfa hafa verið innan eðlilegra skekkjumarka. Eftirlitsforritið kostar um 60 USD.   Lausnir fyrir Linux, Mac og iSeries Linux-tölvur má samstilla með ntpd eða chrony sem jafna tímamun með því að auka eða minnka tiftíðnina í örsmáum áföngum, svo það trufli ekki vinnslu tímaháðra forrita. Forritin nota yfirleitt 3 eða fleiri NTP-þjóna til að tryggja nákvæmni og rekstraröryggi. chrony er smátt og smátt að taka yfir tímastillingar í Linux-umhverfi. Sjá nánari umfjöllun um NTP og áþekkar lausnir. Mac-tölvur bjóða stillingar í stýrikerfinu, er hægt að tilgreina tímaþjóna í valmyndinni "Set date & time automatically" í "Date & Time preference pane" og er klukkan fínstillt eftir þeim. Þar sem Mac OS X er byggt á Unix, er ntpd skipunin notuð í bakgrunni. IBM iSeries (einnig kölluð IBM i eða AS/400) getur samræmt sína klukku við NTP-þjóna, með því að tilgreina forsendur með skipuninni CHGNTPA eða gegnum iSeries Navigator. Sjá nánari leiðbeiningar á vef IBM. Klukkan í iSeries tölvu er mun stöðugri en í PC-tölvu og hentar hún því sem "master" innan netkerfis. Hún notar þá SNTP biðlara til að leiðrétta eigin klukku, og miðlar réttum tíma til annarra tölva á netkerfinu með NTP þjónustu.   Til baka á yfirlit     © 2007-2019, Hugmót ehf - Allur réttur áskilinn